In ’n land met ’n hemelhoë werkloosheidsyfer, waar hoop en oorlewing in die gedrang en die politiek vlambaar en onseker is, en die ekonomie traag en tam bly, is speel nie hoog op die agenda nie. Speel is vir kinders, ’n aktiwiteit wat plesier verskaf sonder ’n uitkoms.

Ons gee ons daagliks oor aan take wat ons moet of behoort te doen, en het selde tyd of energie vir iets wat ons wíl doen. Die lys van verantwoordelikhede en bekommernisse is te lank, te veel, te nimmereindigend. Ons leefwêreld is meer belyn met angs en steurnisse as met speelsheid en spelerigheid.

Om te kan speel moet jy die pauseknoppie druk – halfgebak speel is kroek. Speel vra totale oorgawe, verbeelding, en gewoonlik maats. Speel is ’n dans met die werklikheid, van ’n wêreld wat is, maar ook ’n wêreld wat word. Waar ander reëls geld, waar die onmoontlike haalbaar en selfs moeiteloos word. Speel ontsluit nuwe moontlikhede, dit ontdek wêrelde, en dit plaas jou op ’n onbedreigde plek waar jy net in die oomblik kan wees.

’n Kunstefees is ’n bietjie soos die speeltyd of pouse uit jou skooldae. ’n Klok lui en roetine word opgehef. Daar is vriende, dalk ’n broodjie, ’n uitgelate gejil en gil, of ’n stil oomblik in die biblioteek met ’n boek, dalk ’n weggesteekte stoute oomblik agter die paviljoen. Daar is energie en bruising en dis onmiskenbaar die lekkerste deel van die dag. Ons wil graag hê die fees moet die lekkerste deel van jou jaar wees, dat jy reikhalsend uitsien na die tydperk van 28 September tot 6 Oktober en die slapies aftel voor jy met oorgawe kom fees hou. Saam kom speel. Dat jy verkwik en vervuld hier sal weggaan, met ’n ligter tred.

Saartjie Botha – Direkteur: Toyota Stellenbosch Woordfees