US WOORDFEES: WOW PROJEK
INLEIDING
VISIE EN MISSIE
’n Sterk fokus en doelgerigtheid is die geheim agter die WOW-projek se sukses. Met die volgende missie en visie sluit dié projek direk by die Woordfees aan:
MISSIE
Die Woorde Open Wêrelde-projek wil perspektiewe verruim ter bevordering van taal, letterkunde (lees), die kunste en die gehalte van veral letterkunde-onderrig in skole, ten einde leerders te help bemagtig en hulle aan te moedig om hul potensiaal te ontsluit, onder meer deur verdere studie.
VISIE
Die WOW-Projek, as deel van die Woordfees en die Fakulteit Lettere en Sosiale Wetenskappe aan die Universiteit van Stellenbosch, streef die volgende doelstellings na in aansluiting by bogenoemde missie:
TEN EINDE DIT TE BEREIK, ONDERNEEM ONS:
PROJEK-AKSIES
Skrywersbesoeke Graad 12
Skrywers wie se werk opgeneem is in Gr.12 se voorgeskrewe tekste lees tydens skoolbesoeke voor uit eie werk, bespreek dit en beantwoord vrae. Leerders ontvang inligting oor verdere studiemoontlikhede aan die US.
WOW-dag Graad 12
Gr. 12-leerders word Maties-vir-een dag, woon werkswinkels en die Mardi Gras by, ontmoet rolmodelle en gaan op kampustoere. Vervoertoelaes aan skole en gratis etes aan leerders en onderwysers word voorsien.
Beurse
Vanaf 2006 is twee US studiebeurse spesifiek aan die WOW-projek gekoppel vir studie in die Fakulteit Lettere en Sosiale Wetenskappe, in samewerking met die US Sentrum vir Voornemende Studente. Dit is vanaf 2008 aansienlik uitgebrei na dertien WOW-beurse, sodat studente deurlopend gemonitor kan word.
Skoolkoerantprojek
In samewerking met die US Departement Joernalistiek en Die Burger word werksessies van die die WOW-skoolkoerantprojek op die Saterdag van die Woordfees aangebied. Leerders voer onderhoude en stel ’n eie Woordfeeskoerant saam.
Verf-, Vers- en Verhoogkompetisie
Hierdie kompetisie wakker kreatiwiteit en ’n liefde vir lees aan by leerders in die grondslag- en intermediêre fase vanoor die hele Wes-Kaap. Leerders skryf ’n kort gedig op A3-papier en maak ’n kleurryke plakkaat daarvan. Die werk word uitgestal en wenners word aangewys tydens ’n gala-dag by die Woordfees. Skole kom ook kort toneelstukke opvoer. Hierdie kompetisie begin reeds om aansienlike prestige-waarde in skole te verwerf.
Dramaprojek
Leerders verwerk ’n teks uit hul voorgeskrewe werk tot ’n eie produksie, wat beoordeel word. Die US Departement Drama bied werkswinkels aan die gekeurde groepe en stukke word herskryf. Die wenstukke word tydens die WOW-Dag opgevoer vir die ander leerders. Ons hoop om dit in die toekoms na skole te neem.
E-pos uitwisseling
Hierdie loodsprojek het leerders van twee Wes-Kaapse skole elektronies in aanraking gebring met leeftydgenote in ’n Nederlandse skool – ’n eietydse weergawe van ’n penvriendeprojek.
Mardi Gras
Ten einde ’n ware kulturele ervaring aan die WOW-leerders, maar ook aan die breë gemeenskap te verskaf, is in 2007 vir die eerste keer ’n gratis verhoog op die Braak aangebied, met bekende akteurs en sangers, ’n orkes optog, stalletjies, ’n pretpark en ’n suksesvolle skole idolskompetisie. Dit het in 2008 sowat 4 500 mense getrek.
Leesfees-projek
Leeskringe en leeshoekies vir hoërskoolleerders word gevestig ter verbetering van leerders se ernstige leesprobleme en gebrekkige motivering om te lees. Opvoeders word ook gelei in strategieë en metodes om lees te bevorder en om die 100 boeke wat die Wes-Kaapse Onderwysdepartement per klaskamer beskikbaar stel na behore te benut. Die Leesfees-projek is in 2007 met groot sukses begin in Pniel, in samewerking met twee B. Psig-studente, toe 1028 leerders bereik is tydens die weeklange fees. Die skoolbiblioteek is ook opgegradeer met heelwat boekskenkings. Hierdie projek het groot uitbreidingsmoontlikhede.
Nuwe projekte – indien befondsing gevind kan word:
